ओलीको दाबी : कोशीमा एमालेको सरकार बन्छ, मजाले चल्छ

काठमाडौँ । नेकपा एमालेका अध्यक्ष केपी शर्मा ओलीले कोशी प्रदेशमा अब एमालेको नेतृत्वमा सरकार बन्ने दाबी गरेका छन् ।

शुक्रबार मोरङको विराटनगरमा सञ्चारकर्मीहरुसँग कुराकानी गर्दै ओलीले सर्वोच्च अदालतले कांग्रेस नेतृत्वको सरकार ढाल्ने दाबी गर्दै त्यसपछि एमालेको नेतृत्वमा सरकार बन्ने दाबी गरेका हुन् ।

सत्ता पक्षले नबनेको सरकार बन्यो भन्ने, सभामुखलाई राजीनामा गर्न लगाउने जस्ता काम गरेको भन्दै उनले अघि भने, ‘कांग्रेस जस्तो पुरानो पार्टीले एकछिनका लागि बलजफ्ती गरेको, संविधान मिच्ने ?’

सरकार चलाउन त ४७ पुर्याउनु पर्ला नि भन्ने अर्को प्रश्नमा अध्यक्ष ओलीले भने, ‘४७ होइन, ५० भन्दा माथि जान्छ।’ हिजो हतियार उठाएर हिंडेको माओवादीले संविधान नमान्नु ठूलो विषय नभएको बताउँदै उनले भने, ‘कांग्रेसले त मान्नुपर्थ्यो नि कमसेकम !’

अबको निकास के भन्ने प्रश्नमा ओलीले भने, ‘एमालेको सरकार बन्छ। एमालेको सरकार चल्छ। एमालेले मजाले चलाउँछ।’ कोशीमा हाल गठबन्धन दलसँग ४७ सांसद रहेका छन्। तर सभामुख नहुँदा उपसभामुखले सभा सञ्चालन गर्नुपर्ने अवस्था रहेको छ ।

उपसभामुख नेकपा एमालेबाट निर्वाचत सांसद भएको हुँदा कोशीमा गठबन्धनलाई सरकार चलाउन सहज छैन। गत सोमबार प्रदेश सभाबाट उद्धव थापाले विश्वासको मत लिने दिन उपसभामुख काठमाडौँ हिडेपछि भएको विवाद अहिले सर्वोच्च अदालतमा पुगेको थियो ।