सियारीमा 'जुँगाको लडाई' : अध्यक्षले सार्वजनिक विदा दिँदा प्रमुख प्रशासकीयको छुट्टै विज्ञप्ती

बुटवल । रुपन्देहीको सियारी गाउँपालिकामा अध्यक्ष र प्रमुख प्रशासकीय अधिकृतले गरेको छुट्टाछुट्टै निर्णयले स्थानीय अन्यौलमा परेका छन् । गाउँपालिका अध्यक्ष थानेश्वर घिमिरेले आज सोमबार परेको नागपञ्चीमीको अवसरमा विज्ञप्ती जारी गर्दै सार्वजनिक विदा घोषणा गरेका छन् भने प्रमुख प्रशासकीय अधिकृत रोमनाथ न्यौपानेले सार्वजनिक विदा नभएको भनि विज्ञप्ती जारी गरेका छन् ।

गाउँपालिका अध्यक्ष घिमिरेले आइतबार जारी गरेको विज्ञप्तीमा लेखिएको छ –‘मिति २०८० साल भाद्र ४ गते सोमबार हिन्दु धर्मावलम्बीहरुको महान पर्व साउन शुक्ल पञ्चमी (नागपञ्चमी व्रत) को पावन अवसरमा यस गाउँपालिका मातहतका वडा कार्यालयहरु आकस्मिक सेवा वाहेक (स्वास्थ्य संस्था), शैक्षिक संस्थाहरु एवं संघ संस्थाहरु लगायतका कार्यालयहरुमा सार्वजनिक विदा हुने भएको व्यहोरा अनुरोध छ ।’

सोही मितिमा गाउँपालिकाका प्रमुख प्रशासकीय अधिकृतले भने विदा नभएको कुरा विप्ती जारी गरी जानकारी गराएका छन् । उनले जारी गरेको विज्ञप्तीमा लेखिएको छ –‘भोली मिति २०८०/०५/०४ गतेका दिन नागपञ्चमी सार्वजनिक विदा नभएकोले सबै विद्यालयहरुले यथावत रुपमा पठनपाठनको कार्य सुचारु गर्नुहुन सबै विद्यालयका प्रधानाध्यापक ज्यूहरुलाई जानकारी गरिन्छ ।’