न्यु लाइट माविमा एसईई उत्तिर्ण विद्यार्थीलाई सम्मान

तिलोत्तमा । सामुदायिक गुठीद्वारा सञ्चालित न्यू लाइट माविले एसइई उत्तीर्ण विद्यार्थीहरुलाई सम्मान गरेको छ । एक कार्यक्रमका बीच विद्यालय व्यवस्थापन अध्यक्ष खड्गबहादुर गौतम र प्रधानाध्यापक रमेश ज्ञवालीले सम्मान गरेका थिए ।

सम्मान कार्यक्रममा बोल्दै अध्यक्ष गौतमले अनेकौं कठिनाईका बीचमा पनि शिक्षक र विद्यार्थीको प्रयासमा विद्यालयले उत्कृष्ट नतिजा हासिल गरेको बताए । त्यस्तै प्रधानाध्यापक रमेश ज्ञवालीले एसइईको नतिजाको विश्लेषण गर्दै हरेक विद्यार्थीको क्षमतालाई आकंलन गरेर शिक्षण गरेको कारण प्रत्येक विद्यार्थीको उत्कृष्ट नतिजा सम्भव भएको उल्लेख गरे । व्यवस्थापन समिति सदस्य कर्णबहादुर क्षेत्रीले विद्यार्थीहरुले एसइईमा प्राप्त गरेको नतिजालाई कायम गर्दै थप शैक्षिक प्रगति गरेर देशको सेवा गर्नुपर्ने बताए ।

कार्यक्रममा ए प्लस, ए र बी प्लस सहित उत्तीर्ण सम्पूर्ण विद्यार्थीलाई मायाको चिनो प्रदान गरिएको थियो । विद्यालयमा सानो कक्षादेखि नियमित अध्ययन गरेका विद्यार्थीहरु र उत्कृष्ट नतिजा ल्याउने विद्यार्थीहरुलाई नगद सहिद सम्मान गरिएको थियो । कार्यक्रम विद्यालयका एकेडेमिक इन्चार्ज गोकुल पाण्डेको सञ्चालनमा सम्पन्न भएको थियो ।