‘शिक्षित प्रशस्त भएपनि दक्ष जनशक्तिको अभाव’

माघ ८,

सुमन के.सी. / ग्लोबल आवाज

दाङ । प्रदेश ५ का मुख्यमन्त्री शंकर पोख्रेलले दक्ष जनशक्तिको बिना विकासले गतिलिन नसक्ने बताएकाछन् । तुलसीपुर बहुप्राविधिक शिक्षालय (मेट्रो कलेज)को बुधबार तुलसीपुर १२ हरिपौरा दाङमा उद्घाटन गर्दै मुख्यमन्त्री पोख्रेलले मुलुकमा जनशक्ति प्रशस्त भएपनि दक्ष जनशक्तिको अभाव भई रहेको बताए । रेल सञ्चालनको तयारी सरकारले गरी रहेको छ तर चलाउन सक्ने क्षमता भएका नागरिकको अभावका कारण बिदेशी नागरिकलाई ल्याउनु पर्ने अबस्था सृजना हुने बताए ।

शिक्षित नागरिकको कमी भने मुलुकमा नभएको बताएका मुख्यमन्त्री पोख्रेलले आधुनिक प्रविधिलाई चलाउन सक्ने क्षमता भएका दक्ष नागरिकको उत्पादन गर्नतर्फ बिशेष ध्यान दिनुपर्छ । उनले भने, शिक्षाले नागरिकलाई सचेत बनाउँछ तर जीवन उपयोगी शिक्षा भए देश र आर्थिक सम्बृद्धिमा समेत टेवा पुग्ने छ । शिक्षा क्षेत्रको विकासका लागि सरकारले लगानी गर्नमा कुनैपनि कमी गर्ने छैन। प्रदेश ५ सरकारले मेट्रो कलेजका लागि १० करोड बिनियोजन गरेको समेत उनले जानकारी गराए ।
अर्को प्रसङ्गमा मुख्यमन्त्री पोख्रेलले भने, विश्वकै उत्कृष्ठ संविधान–२०७२ नेपाली नागरिकले प्राप्त गरेका छौं । तर निराश मानसिकताका कारण पछाडी परेको गुनासो गरे । प्राविधिक शिक्षा तथा व्यावसायिक तालिम केन्द्रले ४० जना विद्यार्थी अध्यापन गराउने गरी अनुमति प्रदान गरेको हो । कलेजले गत असोज पहिलो साताबाट शैक्षिक कार्यक्रम सञ्चालन गर्ने गरी भर्ना प्रक्रिया अगाडि वढाएको थियो ।

तुलसीपुरलाई प्राविधिक शिक्षाको केन्द्रमा रुपमा विकास गर्ने उद्देश्यले सञ्चालन गरिएको कलेजमा यो वर्ष वन विज्ञानको तीन वर्षे कार्यक्रम सञ्चालन गरीएको तुलसीपुर उपमहानगरपालिकाका प्रमुख घनश्याम पाण्डेले जानकारी दिए । अन्य प्राविधिक शिक्षालय भन्दा सहुलियत दरमा विद्यार्थीलाई पठन पाठन गराउने उद्देश्यले शिक्षालय सञ्चालन गरिएको पाण्डेले बताए । कलेजमा चालू शैक्षिक सत्रमा २५ जनाले अध्ययन गरीरहेका छन् । कर्णाली प्रदेशका बिभिन्न जिल्लाबाट समेत अध्ययन गर्न आएका नगरप्रमुख पाण्डेले बताए । तुलसीपुर नगरवासीलाई ५० प्रतिशत शैक्षिक शुल्कमा छुट दिएको छ । कलेजले पशुपति मावि हरीपौरीका विद्यार्थी, उत्कृष्ट अंक ल्याउने विद्यार्थी र सहिद परिवार,द्वन्द्वपिडित, मुक्त कमैया र विभिन्न आन्दोलनका घाइते परिवारका विद्यार्थीलाई पनि छुट दिएको छ ।

कार्यक्रमको सञ्चालन नगरप्रवक्ता एवम् वडा नम्वर १२ का अध्यक्ष सुर्यबहादुर डाँगी (श्याम)ले गरेका थिए । बुधबार नै मुख्यमन्त्री पोख्रेलले तुलसीपुर उपमहानगरपालिकाले नगर प्रोफाईल सार्वजनिक गरेका छन् । उपमहानगरपालिकाले विभिन्न विषयसँग सम्बन्धित ताजा तथ्यांक उपलब्ध गराउनका लागि तयार पारेको प्रोफाइलको मुख्यमन्त्री पोख्रेलले सार्वजनिक गरेका हुन् ।