बुटवलको शाइन बहुउद्देश्यीय सहकारीका अध्यक्ष रकम कुम्ल्याएर गायव : पीडितहरु बन्द कार्यालय कुर्दै

बुटवल । बुटवलमा रहेको शाइन बहुउद्देश्यीय सहकारी संस्था लिमिटेडका सञ्चालक बचतकर्ता तथा लगानीकर्ताको लखौ रकम कुम्ल्याएर सम्पर्कविहिन भएका छन् । सहकारीका अध्यक्ष प्रकाश खनालले बचतकर्तालाई रकम फिर्ता गर्नेभने ३ महिनाअघि गरेको बाचा पूरा गर्न नसकेपछि सम्पर्कविहिन भएका हुन् ।

३ महिनाअघि सहकारीको साधारणसभा गरी बचतकर्ताहरुलाई रकम फिर्ता गर्ने प्रतिवद्धा गरेका खनाल आफूले मागेको मसय सकिएपछि एकाएक सम्पर्कविहिन भएका हुन् । विगत ३ महिनादेखि बन्द रहेको सहकारीमा कार्यरत कर्मचारीहरुको समेत रकम कुम्ल्याएर अध्यक्ष सम्पर्कविहिन भएपछि पीडितहरु प्रहरी प्रशासनको शरणमा पुगेका छन् । सोमबार पीडितहरुले केही उपाए नलागेपछि अध्यक्ष खनाल बस्ने घर बुटवल–११ देविनगरमा घेराउ गर्न पुगेका थिए । यसैगरी सहकारीको कार्यालयमा समेत पुगेका उनीहरु कार्यालयको मूल गेटमै ताला झुण्डिएको देखेपछि निराश हुँदे घर फर्केका छन् ।

बुटवलको देविनगरमा सामान्य पसल सञ्चालन गरेर बसेकी गोमा खड्काले आफ्ना २ छोराछोरीको पढाई खर्च जुटाउन सजिलो होस भनि सहकारीमा रकम जम्मा गर्दै आएकी थिइन् । छोराछोरीका लागि भनेर बचत गरेको रकम सञ्चालकले नै कुम्ल्याएर सम्पर्कविहिन भएको खबर पाएपछि उनी पीडामा परेकी छन् । आफूले खाइनखाई बच गरेको ५० हजार बढी रहम सहकारीबाट पाउन रहेको उनले बताइन् ।

तिलोत्तमा–७ घर भई हाल बुटवलमा व्यापार व्यवसाय गर्दै आएका योगेश पाण्डेले ७८ साल भाद्रमहिनादेखि मासिक रुपमा रकम जम्मा गर्दै आएका थिए । व्यवसाय सञ्चालनका लागि विभिन्न समयमा रकम निकालेका कारण ठूलो रकम डुब्नबाट भने आफू जोगिएको उनी बताउँछन् । ६० हजार बढी रकम आफूले पाउनु पर्ने बताएका पाण्डेका अनुसार पीडितहरुले लुम्बिनी प्रदेश सहकारी दर्ता कार्यालय दाङ पुगेर उजुरी दर्ता गराएका छन् । उक्त कार्यालयले आवश्यक कारबाहीका लागि जिल्ला प्रशासन कार्यालय रुपन्देहीलाई पत्र काट्यो, जिल्ला प्रशासनले ईलाका प्रहरी कार्यालयलाई आवश्यक कारबाहीका लागि निर्देशन दियो । तर सहकारीका सञ्चालक खनाल भने सम्पर्कविहिन भएर बसिदिए । यसरी सञ्चालक सम्पर्कविहिन भएर बसेपछि प्रहरी प्रशासनले समेत उनलाई नियन्त्रणमा ल्याउन नसक्दा आफूहरुले न्याय पाउनेमा विश्वास गुम्दै गएको पीडित मध्येका प्रदिप थैवले गुनासो गरे । सहकारीबाट ३ लाख बढी रकम आफूले पाउनु पर्ने बताएका थैवका अनुसार दोषीलाई प्रहरीले प्रक्राउ गरी कारबाही प्रक्रियामा ल्याउन चासो दिएको देखिदैन । सहकारी सम्बन्धि नियामक निकाय समेत समस्याप्रति गम्भिर नभएको पीडितहरुको बुझाई छ ।

सहकारीले बचतकर्ताको मात्रै होइन स्वयम् सहकारीका कर्मचारीहरुको समेत रकम ठगी गरेर फरार रहेको पीडितहरुको गुनासो छ । सहकारीमा आवद्ध कर्मचारीहरुको मात्रै ३० लाख बढी बचत रकम निकाल्न नपाएको उनीहरुले बताए । सहकारीमा कार्यरत कर्मचारी करिश्मा श्रेष्ठले आफूलेको काम गरेबापत २ महिनाको मासिक पारिश्रमिक पाएकी छैनन् भने बचतमा रहेको ५० हजार पनि निकाल्न पाइनन् । यसैगरी अन्जना मल्लिकले पनि २ महिनाको तलव सुविधा नपाएको र बचतमा रहेको ४ लाख रकम निकाल्न नपाएको गुनासो गरिन् । पीडित कर्मचारीहरुका अनुसार सहकारीका अध्यक्ष खनालको सुरुदेखिकै जीवन शैली र पछिल्लो समय देखाएको गतिविधिले ठगी गर्ने नियत प्रस्त भएको छ । सहकारीको बैंक म्यानेजर रहेकी अनिता पछाईको समेत १५ लाख बचत रकम डुबेको छ भने काम गरेको पारिश्रमिक समेत पाएकी छैनन् । करिब ५ हजार साधारण सदस्य रहेको उक्त सहकारीमा नियमित बचत गर्ने १५ सय बढी सदस्य रहेको कर्मचारीहरु बताउँछन् ।

ईलाका प्रहरी कार्यालय बुटवलका प्रहरी नायव उपरीक्षक दाबहादुर थापाले आवश्यक कारबाहीका लागि सहकारीका सञ्चालकलाई सम्पर्कमा ल्याउने प्रयास भैरहेको बताए । सञ्चालक खनाल बुटवल क्षेत्रमै नभएको आशंकामा नियन्त्रणका लागि अन्य ठाउँमा समेत समन्वय गर्ने काम भइरहेको दाबी गरे ।