प्रमिला भन्छिन्- हुक्काः एन एब्जर्ड ड्रिमको स्वाद लोकल चामलजस्तै

काठमाडौं । अभिनेत्री प्रमिला खनाल अभिनित फिल्म ‘हुक्काः एन एब्जर्ड ड्रिम’ आगामी जेठ १२ गतेबाट प्रदर्शनमा आउँदैछ । पोखरामा जन्मिएर चितवनमा हुर्किएकी प्रमिला गाउँमा रहँदा कोइला बालेर तमाखु भरी धुँवा तान्ने भाडालाई ‘हुक्का’ मान्थिइन् । वास्तविकता पनि त्यही थियो ।

तर फिल्म ‘हुक्काः एन एब्जर्ड ड्रिम’मा अभिनय गरेपछि मात्र ‘हुक्का’को अर्थ बुझिन् । ‘हुक्कालाई मैले हेर्दा सामन्य कोइला बालेर तमाखु भरी धुवाँ तान्ने भाडाका रुपमा सम्झन्थे । हुक्कालाई समाजमा प्रतिष्ठाको विषय मानिँदो रहेछ भन्ने सुनेको थिएँ । तर यो फिल्ममा काम गरेपछि त्यो भ्रम मात्र रहेछ भन्ने थाहा पाएँ,’ प्रमिला भन्छिन् ।

प्रमिलाको बुझाईमा ‘हुम्काः एन एब्जर्ड ड्रिम’को कथा ‘लोकल चामल’ जस्तै हो । ‘आम नेपालीलाई ‘लोकल चामल’को स्वाद थाहा भइरहेको बेला यो फिल्मले त्यो स्वाद दिनेमा म आशावादी छु । फिल्ममा लोकल चामलकै स्वाद जस्तै विषय देखाउन र चखाउन खोजिएको छ । हामीले कुनै भयङ्कर फरक र डर लाग्दो विषय पनि उठाएका छैनौं । तर जे भन्न र देखाउन खोजेका छौं । त्यो चाहिँ फरक तरिकाले देखाउने प्रयास गरेका छौं’, प्रमिलाको बुझाई छ ।

फिल्म ‘दबाब’बाट अभिनय यात्रा सुरु गरेकी प्रमिलाले त्यसयता उनले धेरै फिल्ममा सहायक चरित्र निभाईन् । तर ‘हुक्काः एन एब्जर्ड ड्रिम’मा भने उनले प्रमुख चरित्र निर्वाह गरेकी छन् ।

प्रेमिलाले फिल्ममा साहसी र निडर महिलाको भूमिका निर्वाह गरेकी छन् । ‘सम्बन्धविच्छेदपछि माइतमै बसेकी एक छोरीकी आमा र गाउँकी मुखियाकी छोरीको चरित्रमा देखिएकी छु’, आफ्नो भूमिकाबारे प्रमिला भन्छिन् ।

यो फिल्ममा प्रमिला लकडाउन पछि जोडिएकी हुन् । ‘मेरो चरित्रसँगै फिल्मले देखाउन खोजेको विषयवस्तु पनि मन पर्यो । अर्को कुरा सबै सुटिङ पोखरामा नै हुने भएपछि म यो फिल्ममा जोडिएँ’, उनी भन्छिन्, ‘किनकी कोरोनाले सुनसान बनेको काठमाडौबाट केही समय टाढा बसेर काम गर्ने मौका पाएकी थिएँ । त्यो मौकालाई गुमाउन चाहिनँ । त्यो समय सुटिङ गर्न जादैछु भन्दा पनि केही सिक्न र आफुलाइ फ्रेस बनाउन जादैछु भन्ने थियो ।’

प्रमिलाको बुझाईमा ‘हुक्काः एन एब्जर्ड ड्रिम’ले समाजकै कथा बोल्छ । उनले ट्रेलरमा देखाइएका विषयवस्तु समाजसँग ‘रिलेट’ गर्ने भएकाले पनि फिल्म राम्रो बनेको दाबी गरिन् ।

प्रमिला यो समय मातृत्वकालको अनुभव लिइरहेकी छन् । गत वैशाखमा उनी छोराको आमा भइन् । फिल्ममा पनि उनले एउटी छोरीकी आमाको चरित्र निभाएकी छन् । ‘फिल्मले एउटी आमाको छोरी प्रतिको दावित्व, कर्तव्य र सम्बन्ध निकै प्रगाढ देखाएको छ । अहिले म पनि वास्तविक जीवनमा आमा बनेकी छु । सन्तानसँग एउटी आमाको सम्बन्ध अविस्मरणीय हुँदो रहेछ’, प्रमिला भन्छिन्, ‘अहिले छोरालाई बढी समय दिइरहेकी छु । यही बेला फिल्मको रिलिज हुने भएकाले फिल्मको प्रोमसनमा हिँड्न नपाउँदा खुःख लागेको छ ।’

शम्भु थापाको निर्देशन रहेको फिल्ममा प्रमिलासँगै, सन्तोषकुमार आत्रेय, प्रकाश घिमिरे, तेज गिरी, अशु न्यौपाने, तलिशा गुरुङ, निश्चल विमल, एलिशा विकको अभिनय छ । रेश्मा प्रधान सह–निर्माता, पार्वती थापा, सुशीला गुरुङ र सागर गोदार क्षेत्री निर्माता रहेको फिल्ममा कमलबहादुर भुजेल र किरणकुमार आत्रेय कार्यकारी निर्माता छन् । फिल्मको वितरण उपत्यकामा स्टेसन फाइभ र उपत्यका बाहिर एफडी कम्पनीले गर्नेछन् ।