गुल्मीमा डढेलो निभाउँदा घाइते थप एक पुरुषको मृत्यु

गुल्मी । वनमा लागेको डढेलो निभाउने क्रममा विहिबार राती गम्भीर घाइते भएका थप एक जनाको मृत्यु भएको छ । जिल्लाको धुर्कोट गाउँपालिका–३ स्थित बर्दबास सामुदायिक वनको आगो निभाउने क्रममा गम्भीर घाइते स्थानीय ५२ वर्षीय धन बहादुर जोगि कुवरको उपचारका लागि काठमाडौं लैजाने क्रममा शुक्रवार बाटोमै मृत्यु भएको हो । घाइते भएका अर्का १३ वर्षीय बालक दिपक कुमालको घटना भएकै राती मृत्यु भएको थियो ।

जिल्ला प्रहरी कार्यालयका सुचना अधिकृत प्रहरी निरीक्षक रबिन्द्र कुमार श्रेष्ठले लुम्बिनी प्रादेशिक अस्पतालबाट काठमाडौं रिफर गरिएका जोगि कुवरको बाटोमा मृत्यु भएको पुष्टि गरेका हुन । त्यस वडाका अध्यक्ष पदम बिष्टले उनको बर्दघाट पुग्दा मृत्यु भएको बताए । उनका अनुसार घटना हुने दिन साझ ६ बजेदेखि आगो निभाउन खटेका गाउँबासी मध्ये होसियारी अपनाउन नस्क्दा उनिहरुको पूरै शरीर जलेको थियो ।

मृतकका परिवारलाई ४० हजारका दरले कृया खर्च दिने र क्षतिपूर्ति राहतका लागि प्रदेश र संघमा सिफारिस गर्ने धुर्कोट गाउँपालिका अध्यक्ष भुपाल पोखरेलले बताए । जिल्ला प्रहरी प्रमुख एसपी नवीन कुमार प्रधानले गत फागुनदेखि बैशाख ८ गतेसम्म जिल्लाका ५१ स्थानमा आगो लागि भएको र यस अवधिमा चार जनाको ज्यान गएको बताए।

मृतकका परिवारलाई दुई लाखका दरले राहत प्रदान गरिने प्रमुख जिल्ला अधिकारी सागरमणी पाठकले बताए । सुरक्षा निकाय वा सरकारी मानिस आगो नियन्त्रणमा त्यसरि मृत्यु वा अङ्ग–भङ्ग हुँदा ठूलो रकम पाउने तर नागरिकको मृत्यु हुँदा भने जम्मा दुई लाख मात्रै दिनु भनेको नागरिकको ज्युज्यानको अबमुल्यान हुनु सरह भएको नागरिक अगुवाहरु बताउछ्न ।