रुपन्देहीको तिलोत्तमामा खुला व्यायामशाला सञ्चालनमा

बुटवल। रुपन्देहीको तिलोत्तमा नगरपालिका–६ मा खुला व्यायामशाला सञ्चालनमा आएको छ । वडा नम्बर–६ को कार्यालयले युवादेखि वृद्धवृद्धासम्मका लागि उपयोगी हुने गरी तिलोत्तमा सामुदायिक पार्कको खाली जग्गामा खुला व्यायामशाला सञ्चालन भएको हो । खुला ठाउँमा जुन सुकै समय र उमेर समूहका नागरिकलाई लक्षित गर्दै व्यायाम गर्न मिल्ने गरी व्यायामशाला निर्माण गरी सञ्चालनमा ल्याइएको वडा कार्यालयले जनाएको छ ।

तिलोत्तमा सामुदायिक पार्कको खाली जग्गामा स्थापना गरिएको खुला व्यायामशालामा विभिन्न आधुनिक १५ वटा उपकरण राखिएको छ । आयुर्वेद तथा वैकल्पिक चिकित्सा विभागको ९ लाख रुपैयाँ आर्थिक सहयोगमा खुला व्यायामशालामा १५ वटा विभिन्न उपकरण जडान गरिएको हो । आइतबार एक कार्यक्रमबीच तिलोत्तमा नगरपालिकाका प्रमुख रामकृष्ण खाँणले खुला व्यायामशालाको उद्घाटन गरे । खुला व्यायामशालाको उद्घाटन गर्दै खाँणले तिलोत्तमा नगरपालिका पूर्वाधार विकासमा मात्र नभई मानवीय विकासमा पनि अगाडि बढेको बताए ।

हरेक वडामा पार्क र व्यायामशाखा निर्माण गर्ने योजना रहेको पनि उनले सुनाए । वडा नम्बर–६ का वडाध्यक्ष गणेश पाठकले खानपान र जीवनशैलीमा आएको परिवर्तनले व्यक्तिमा विभिन्न प्रकारको दीर्घरोग बढिरहेको अवस्थामा स्वस्थ जीवन जिउनका लागि नियमित शारीरिक अभ्यासमा व्यायामशालाले उत्प्रेरित गर्ने बताए । व्यायामशालामा आवश्यक उपकरण जडानका लागि आयुर्वेद तथा वैकल्पिक चिकित्सा विभागलाई अनुरोध गरिएकोमा विभागले विभिन्न १५ वटा उपकरण आधुनिक उपलब्ध गराएको उनले जानकारी दिए ।