बुटवलको द जंग स्ट्रोङ नेल आर्टमा 'ठगी धन्दा' न्याय खोज्दै पीडितहरु पुगे प्रहरीमा

बुटवल । सीप सिकाएर विदेश पठाउने बहानामा काठमाण्डौंमा केन्द्रीय कार्यालय भई बुटवलमा शाखा कार्यालय रहेको ’द जंग स्ट्रोङ नेल आर्ट प्रा.लि.’ नाम एक कम्पनीले लाखौ रकम ठगी गरेको भन्दै प्रहरीमा उजुरी परेको छ । सीप सिकाएर विदेश पठाउने भन्दै लाखौ रकम असुली गरेर कम्पनीले बेवास्ता गर्न थालेपछि पीडितहरु प्रहरी समक्ष पुगेका हुन् ।

उक्त संस्थाले सीप सिकाएर ६ महिनामै विदेश पठाउने बहानामा प्रतिव्यक्ति ४ लाखसम्म असुली गरेको पीडितहरुले बताए । रोजगारका लागि दुबई पठाउने र प्रतिमहिना १ लाखसम्म पारिश्रमिक मिल्ने प्रलोभन देखाइएको पीडित मध्येकी मौसमी कार्कीले बताइन । सामाजिक सञ्जाल फेसबुकमा विज्ञापन देखेपछि रोजगार पाउने आशामा बुटवलको कालिकानगर साईबाबा पथ स्थित द जंग स्ट्रोङ नेल आर्टमा आउन लागेको उनी करिब एक वर्ष हुन लागेको छ । हालसम्म विभिन्न समयमा किस्ता किस्तागरी कन्सल्टेन्सीले ३ लाख २० हजार बढी रकम आफूबाट असुली गरेको पीडित कार्कीले बताइन । गत वैशाखदेखि कम्पनीमा धाउन लागेकी उनले तालिमका लागि तथा विदेश जाने प्रक्रियाका लागि भन्दै दिएको रकम बाहेक अन्य विभिन्न समयमा सेमिनार शुल्क समेत छुट्टै बुझाउने गरेको बताइन । प्रतिव्यक्ति २० हजारका दरले विभिन्न समयमा हुने सेमिनारमा छुट्टै शुल्क समेत उठाउने गरेको उनले गुनासो गरिन् ।

यसैगरी रुपन्देहीको देवदह खैरेनीका दिपिका सापकोटा कम्पनी धाउन थालेको एक वर्ष पूरा भयो । तर, हालसम्म विदेश जाने कुनै टुङ्गो नलागेपछि पैसा फिर्ता पाउनु पर्ने भन्दै प्रहरी समक्ष पुगेकी हुन् । दिपीकाले श्रीमान भरत सुवेदीसँग सल्लाह गरि सुरुमा ५० हजार शुल्क तिरेर तालिम लिन संस्थामा जोडिएकी हुन । लगत्तै थप ३ लाखको कोर्ष गरेपछि विदेश पठाउने प्रलोभनमा परी सो रकम पनि कम्पनीलाई बुझाइन । विभिन्न समयमा सेमिनार लगायत वहानामा दिएका विभिन्न शुल्कहरुको बारेमा आफूलेसमेत लेखाजोखा नै नराखेको उल्लेख गरिन ।

रुपन्देही सैनामैना बनकट्टाकी जुनु परियारले पनि प्रलोभनमा परी २ लाख ७५ हजार गुमाएको उल्लेख गरिन् । गत साउनदेखि कम्पनीमा जोडिएकी उनले पहिलो पटक २ लाख र त्यसपछि ५० हजार र २५ हजार गरि रकम बुझाएकी हुन्। उनीहरुसँगै आएका ७ जना महिलाहरुको समूहले आफूहरु बाहेक थुप्रै महिला दिदी–बहिनीहरु ठगिन पुगेको उल्लेख गरे । उनीहरुले प्रतिव्यक्ति २ लाख ५० हजारदेखि ४ लाखसम्म बुझाएको उल्लेख गरे । उनीहरुसँग रहेका कतीय त पैसा डुबेपछि पैसा असुली नहुने भन्दै ऋण तिर्न भारततिर रोजगारका लागि लागेको उनीहरुले बताए । सीप सिकाउने भनेर रकम असुलेको कम्पनीले कुनै पनि सीप नसिकाएको तथा प्रमाणपत्र समेत उपलब्ध गराउन नमानेको गुनासो गरे ।

विदेश पठाउनेभन्दै पटक–पटक काठमाण्डौं तथा बुटवलमै अन्तरवार्ता गराएर टार्ने काम गरिएको पीडितहरुको गुनासो छ । उनीहरुसँगै बुटवलमा थुप्रै महिलाहरु ठगिएको पीडितहरुले बताए । आफूहरु ठगिएको पत्तो पाएपछि पीडितहरुले आधा रकम भएपनि फिर्ता गर्न पाए हुन्थ्यो भन्नेमा पुगेको गुनासो पोखे ।

कम्पनीका बुटवल शाखाका प्रमुख विजेन्द्र मल्ल (किरण मल्ल)ले भने तालिममा सहभागीहरुलाई विदेश पठाउनका लागि प्रक्रिया अन्तिम चरणमा पुगेको बताए । ’सबै प्रक्रिया अन्तिम चरणमा पुगेको अवसरमा उहाहरुले एक्कासी पैसा फिर्ता माग्दै विदेश नजाने कुरा गर्नुभयो ।’– मल्लले भने, उहाहरुलाई तालिम प्रदान गरिरहेका छौ । विदेशका कम्पनीहरुमा रोजगारका लागि डकुमेन्टहरु पनि पठाउने काम भएको छ । अन्तरवार्ता समेत गराइसकेको अवस्थामा एक्कासी विदेश नजाने बताएपछि आफूहरु पनि अन्यौलमा रहेको उनले बताए । आफ्नो कम्पनी विदेश पठाउने भन्दा बढी तालिम प्रदान गर्ने भएकाले पहिले नै सम्झौता गरि तालिम प्रदान गरिएको कम्पनीका जेनरल म्यानेजर निरज जिरेलले बताए ।

ईलाका प्रहरी कार्यालय बुटवलमा ठगीमा परेको मन्दै पीडित भनिएकाहरुले जाहेरी दर्ता गराएको कार्यालयका प्रमुख प्रहरी नायव उपरीक्षक दानबहादुर थापाले बताए । समस्या समाधानका लागि आफूले मध्यस्तको भूमिका निर्वाह गरेपनि यो विषय बैदेशिक रोजगार विभागसँग सम्बन्धित रहेको थापाले बताए । उनले पहिलो चरणमा दुवै पक्षलाई राखेर समधानको बाटो खोज्न आग्रह गरेपनि अहिलेसम्म यो विषयको टुंगो दुवै पक्षले नगरेको बताए । आपसी सहमतीमा हुन नसक्ने अवस्थामा आफ्नो कार्यालयले नभई वैदेशिक विभागले नै यसको समाधान निकाल्ने उनले बताए ।