बुटवलको कालिका मावि र समिट बोर्डिङ स्कुल धादली गरेपछि कारबाहीमा

बुटवल। बुटवलमा भएको राष्ट्रपति छनौट नगरस्तरीय प्रतियोगितामा धादली गरेपछि दुई विद्यालय कारबाहीमा परेका छन् । बुटवलको कालिका मावि र समिट बोर्डिङ स्कुल कारबाहीमा परेका हुन् ।

फुटबल प्रतियोगितामा तोकिएको मापदण्डभन्दा बढी उमेरका र बाहिरी विद्यालयका खेलाडी खेलाएपछि कारबाहीमा परेका हुन् । ती विद्यालयहरु कारबाहीमा परेको खेलकुद विकास समिति रुपन्देहीका अध्यक्ष भुपेन्द्र बहादुर क्षेत्री (हरि) ले बताए । प्रतियोगितामा १८ वर्ष ननाघेको (२०६१ साल फागुन १० गते) भित्र जन्म मिति भएका विद्यार्थीहरु मात्र खेल्न पाउने प्रावधान रहेको छ । सिद्देश्वर खेलमैदानमा भएको खेलमा कालिका मानव ज्ञानका खेलाडीहरु २०६० साल जन्म मिति रहेका ३ जना विद्यार्थीहरु समावेश गरेको उजुरी परेपछि छानबिनको क्रममा प्रमाणित भई कारवाही गरिएको उनले बताए । फागुन १० गते भएको कालिका मावि र स्कलर्स होम बोर्डिङ स्कुल बीचको खेलमा कालिकाले ३ जना खेलाडी उमेर हदभन्दा बढी उमेर नाघेका खेलाएका थिए ।

यसैगरी दीप बोर्डिङ स्कुलसंँगको खेलमा समिट बोर्डिङ स्कुलले गोलकिपर बाहिरी विद्यालयका खेलाडी राखेर खेलाएपछि बिवाद उत्पन्न भएको थियो । गोलकिपर सन्देश खनाल समिटमा पढेको प्रमाण नभेटिएको अध्यक्ष क्षेत्रीले बताए । जारी प्रतियोगितामा फुटबलको उपाधिका लागि फाईनलमा अक्सफोर्ड इङ्गलिस बोर्डिङ स्कुल र त्रिभुवन इङलिश बोर्डिङ स्कुल बीच खेल हुने छ ।