कपिलवस्तुमा श्रीमतिसँग आफ्नै बुवालाई नग्न भेटेपछि छोराले गरे हत्या

बुटवल । कपिलवस्तुको शिवराज नगरपालिका–१० शितलापुरमा ६४ वर्षीय वृद्धको हत्या आरोपमा छोरा र बुहारीलाई प्रहरीले पक्राउ गरेको छ । शितलापुर बस्ने मगरे पासी बुधबार बिहान आफ्नै घरमा झुण्डिएको अवस्थामा मृत फेला परेका थिए । घटना शंकास्पद देखेपछि प्रहरीले अनुसन्धानका लागि छोरा र बुहारीलाई पक्राउ गरेको जिल्ला प्रहरी कार्यालय कपिलवस्तुका प्रवक्ता प्रहरी नायव उपरीक्षक मिनबहादुर घलेले जानकारी दिए ।

वडा प्रहरी कार्यालय चन्द्रौटाका प्रमुख प्रहरी निरीक्षक कपिलजंग शाहीको कमान्डमा घटनास्थल पुगेको प्रहरी टोलीले मृतकको छोरा ३० वर्षीय मग्निराम पासी र २६ वर्षीय बुहारी मिमा पासीलाई नियन्त्रणमा लिएको हो । छोरा र बुहारीलाई नियन्त्रणमा लिएर अनुसन्धान गर्दा छोराले नै बुबाको हत्या गरेको प्रारम्भिक जानकारी हुन आएको प्रहरी निरीक्षक शाहीले ग्लोबल आवाजलाई बताए । मँगलबार विहान ११ बजे पसलबाट घरमा खाना खान गएको समयमा छोराले आफ्नै श्रीमतीसँग बुवा (मृतक मगरे)लाई नग्न अवस्थामा देखेपछि हत्या गरेको प्रारम्भिक अनुसन्धानमा बयान प्राप्त भएको प्रहरीले जनाएको छ ।

श्रीमतिलाई नग्न अबस्थामा देखे पश्चात बाबुको हत्या गरेको र सोही दिन (मँगलबार) राती ११ बजे डोरीमा बांधी झुण्ड्याएको भनि आरोपितले बयान दिएका छन् । घटनाको अर्को दिन बुधबार बिहान ८ बजे मात्र प्रहरीलाई सूचना प्राप्त भएको प्रहरी निरीक्षक शाहीले बताए । मृतक मगरे पासीको शरिरमा चोट समेत देखिएको छ । घटना बारे थप अनुसन्धान हुन बाँकी रहेको प्रहरीले जनाएको छ ।