ख्वपमा खेलकुद सप्ताह सुरू

भक्तपुरको ख्वप कलेजमा खेलकुद सप्ताह २०७९ को सुरु भएको छ । ख्वप माविको २३औं, ख्वप कलेजको २१औं, शारदा क्याम्पसको ३२औं वार्षिक उत्सवको अवसरमा विभिन्न खेलकुद प्रतियोगिताहरु सुरू गरिएको हो । 

भक्तपुर नगरपालिकाद्वारा सञ्चालित कलेजहरुको समूह ख्वप सर्कलका उपाध्यक्ष तथा भक्तपुर नगरपालिकाकी उपप्रमुख रजनी जोशीले शुक्रबार प्रतियोगिताको उद्घाटन गरेकी हुन् । 

प्रतियोगिताको उद्घाटन सत्रमा  छात्रा एक हजार मिटर र छात्रा तीन हजार मिटर दौड प्रतियोगिता सुरु भएको छ । 

वार्षिकोत्सवको अवसरमा बिहीबार चित्रकला प्रतियोगिता भएको थियो । प्रतियोगितामा कक्षा ८ देखि कक्षा १० समूहमा जेन्युइन इगलिश सेकेण्डरी स्कुलका जोहेन कायष्ठ प्रथम भएका थिए । कक्षा ११ र १२ को समूहमा भने सैनिक आवासीय महाविद्यालयका देमिन प्रजापति प्रथम भएका थिए । 

वार्षिकोत्सवको अवसरमा विभिन्न खेलकुद प्रतियोगिताहरु हुने क्रममा शुक्रबार नै छात्र र छात्रा व्याडमिन्टन हुनेछन् । टेबुलटेनिस छात्र र छात्रा, सटपुट छात्र र छात्रा, चेस छात्र र छात्रा तथा फुटसल छात्र शनिबारबाट सुरु हुने जनाइएको छ । 
साथै छात्रा फुटसल, भलिबल छात्र र छात्रा आइतबारबाट सुरु हुने जनाइएको छ ।