बलिउड अभिनेता विवेक ओबराय नेपाल भ्रमणमा, लुम्बिनी घुम्न रुपन्देही आउने

बुटवल । बलिउड अभिनेता विवेक ओबराय बुधबार सपरिवार काठमाण्डौं आइपुगेका छन् । नेपाल भ्रमणमा आएका उनले पशुपतिनाथ मन्दिरको दर्शनसँगै नेपालका पर्यटकीय स्थलहरुको भ्रमण गर्ने कार्यक्रम रहेको छ ।
आज विहान पशुपतिनाथको दर्शनपछि चन्द्रागिरीको भ्रमण गर्ने र त्यसपछि पोखरा जाने तालिका रहेको जनाईएको छ । पोखरामा रहँदा उलने प्याराग्लाइडिङ, बन्जीजम्प, जीप फलायर गर्नुका साथै पोखराका पर्यटकीय ठाँउको भ्रमण गर्ने बताईएको छ ।

पोखरापछि उनी धौलागिरि हिमालको अवलोकन गर्न म्याग्दीको घोरेपानी पुग्नेछन भने त्यहाँ छोटो पदयात्रापछि पुनः पोखरा आई भैरहवा आउने कार्यक्रम रहेको छ । भैरहवामा रहँदा बुद्ध जन्मस्थल लुम्बिनीसहित तिलौराकोटको समेत भ्रमणगरी भैरहवामा आयोजना हुने मिट एण्ड ग्रीट कार्यक्रममा सहभागी हुने छन् । त्रिभुवन विमानस्थलमा बुधबार बेलुका अवतरण गरेका उनलाई नेपालको राष्ट्रिय झण्डा प्रदान गरी स्वागत गरिएको थियो ।  विमानस्थलमा सञ्चारकर्मीहरुसँग संक्षिप्त कुरा गर्दै उनले नेपाल भ्रमणको उद्देश्य र यहाँ बस्दाको कार्यतालिका बारे जानकारी गराए ।

उनले आफू यसअघि नेपाल नआएको तर बुवाआमा धेरै पटक नेपाल आएको बताए । उनले भने, 'मलाई पशुपतिनाथको दर्शन गर्नु थियो र बच्चाहरुलाई पनि नेपाल देखाउनु थियो । नेपाल र भारत बीच नजिकको सांस्कृतिक सम्बन्ध रहिआएको छ । मलाई लाग्छ, बच्चाहरुले पनि नेपाल देख्नुपर्छ र मैले पनि हेर्नुपर्छ ।' यसैगरी उनले लुम्बिनी र पोखरा घुम्ने इच्छा भएको उल्लेख गरे । ओबराय ३ दिन काडमाण्डौ, ६ दिन पोखरा तथा १ दिन भैरहवामा रहने र २४ डिसेम्बरमा भारत फर्कने कार्यक्रम रहेको छ ।

सन् २००२ मा ‘कम्पनी’ फिल्मबाट डेब्यु गरेका विवेक पछिल्लो समय भारतीय प्रधानमन्त्री नरेन्द्र मोदीको बायोपिक फिल्म ‘पीएम नरेन्द्र मोदी’ मा देखिएका थिए।