बुटवलको कान्ति माविमा राष्ट्रिय बाल दिवसमा भित्ते पत्रिका बिमोचन

बुटवल । बुटवल उपमहानगरपालिका-४ स्थित कान्ति माविले राष्ट्रिय बाल दिवसका अवसरमा विभिन्न कार्यक्रमको आयोजना गरेको छ । ‘बाल मैत्री समाजको आधार, जिम्मेबार परिवार उत्तरदायी सरकार’-भन्ने मूल नाराका साथ बुधबार ५८ औं राष्ट्रिय बाल दिवस मनाएको हो ।

दिवसका अवसरमा वार्षिक परीक्षा २०७८ मा प्रथम, द्वितीय र तृतीय स्थान प्राप्त गर्ने विद्यार्थीलाई पुरस्कार वितरण गरिएको विद्यालयले जनाएको छ । यसै बीच विद्यार्थीका अन्तरनिहित प्रतिभा प्रस्फुटन गराउने उद्देश्यले कान्ति बाल वाटिका नामक भित्ते पत्रिकाको प्रकाशन तथा विमोचन गरिएको छ । बुटवल उपमहानगरका शिक्षा तथा जनस्वास्थ्य महाशाखा प्रमुख मित्र मणी खनालले पत्रिकाको विमोचन गर्दै निरन्तरताका लागि आग्रह गरे । भित्रे पत्रिका प्रकाशन गरी विद्यार्थीका प्रतिभाहरु प्रस्फुटन गर्ने कुरा जति महत्वपूर्ण छ, त्यतिनै चुनौतीपूर्ण निरन्तरता दिनमा रहेको उनले बताए ।

विद्यालयले मासिक रुपमा पत्रिका प्रकाशन गर्ने जनाएको छ । विद्यालय व्यवस्थापन समितिका अध्यक्ष हेमानन्द शर्माको अध्यक्षता भएको कार्यक्रममा विद्यालयका प्रधानाध्यापक गोविन्द ज्ञवाली, विद्यालयका उप-प्राचार्यद्वय पूर्णभ्रद उपाध्याय, केदारनाथ ज्ञवाली तथा विद्यालयका शिक्षक कर्मचारीको उपस्थिती रहेको थियो ।