महिला साफ च्याम्पियनसीप : दुई महत्वपूर्ण खेलाडी बिना नेपालले श्रीलङ्काको सामना गर्दै

काठमाडौं। नेपाली राष्ट्रिय टोलीका महत्वपूर्ण खेलाडीले साफ च्याम्पियनसीपमा आज हुने श्रीलंकाविरुद्धको खेल गुमाउने भएका छन्। स्ट्राइकर सावित्रा भण्डारी र डिफेन्डर मन्जली कुमारी योन्जन आजको खेलमा अनुपस्थित रहने भएकी हुन्।

दुवैजनालाई डेङ्गु संक्रमण भएको छ। अखिल नेपाल फुटबल संघ एन्फाका प्रवक्ता सुरेश शाहले सावित्रा र मन्जलीमा डेङ्गुको संक्रमण देखिएको पुष्टि गरे । २ खेलाडीसंगै गोलरक्षक प्रशिक्षक सुरज कुमार लामामा समेत संक्रमण पुष्टि भएको छ। उनीहरुलाई मेडिसिटी अस्पतालमा राखिएको छ। संक्रमण देखिएसँगै २ खेलाडी आज श्रीलंकाविरुद्धको खेलमा नेपाली टोलीमा हुने छैनन्। नेपाली राष्ट्रिय टोलीकी मूख्य प्रशिक्षक कुमार थापाका अनुसार खेलाडीहरू अहिले आइसोलेसनमा छन्।

‘अहिले आइसोलेसनमा राखेका छौं। डेङ्गु टेस्ट पोजेटिभ आएपछि छुट्टै राखिएको हो। सामान्य ज्वरो आएको छ।’ थापाले भने ‘श्रीलंकासँगको खेलमा उनीहरू नेपाली टोलीमा हुने छैनन्। त्यसपछि पनि भन्न सक्ने अवस्था छैन।’ स्वास्थ्य अवस्था भने सामान्य रहेको छ। महिला साफ च्याम्पियनसिप फुटबलको दोस्रो खेलमा नेपालले आज श्रीलंकासँग प्रतिस्पर्धा गर्दैछ। त्रिपुरेश्वरस्थित दशरथ रंगशालामा नेपालले श्रीलंकाको सामना गर्नेछ । नेपाल र श्रीलंकाबीचको खेल साँझ ५:३० बजे सुरु हुनेछ ।

नेपाल आज लगातार दोस्रो जितको खोजीमा रहेको छ। नेपाल श्रीलंकालाई हराएर सेमिफाइनल पुग्न चाहन्छ। समूह ‘बी’ को नेपालले १ खेलमा ३ अंक जोडेको छ। श्रीलंकालाई पराजित गरेको खण्डमा नेपाल समूह विजेता बन्दै अन्तिम चारमा पुग्नेछ। नेपालले पहिलो खेलमा भुटानलाई ४–० गोल अन्तरले हराएको थियो। सो खेलमा सावित्राले २ गोल गरेकी थिइन्।