बुटवलको दीप बोर्डिङमा दादागिरी : ‘शिक्षकले विद्यार्थी कुट्ने, प्राचार्यले अभिभावक थर्काउने’

बुटवल । बुटवल दीपनगरस्थित दीप बोर्डिङ हाई स्कुलका शिक्षकले कक्षा १० मा पढ्ने विद्यार्थीलाई घाइते हुनेगरी कुटपिट गरेका छन् । विद्यालयका कम्प्युटर विषयका शिक्षक एकराज गुरागाईँले विद्यार्थी जेनित रायमाझीलाई कुटेको विद्यार्थीका अभिभावकले बताएका छन् ।

तिलोत्तमा वडा नं. ५ घर भएका जेनित कक्षा कोठामा हासेको भन्दै शिक्षकले कुटेको अभिभावक चन्दा रायमाझीले बताइन् । यसअघि पनि आफ्नो छोरामाथि विद्यालयमा शिक्षकले कुटपिट गर्ने गरेको उनले बताइन् ।

उनका अनुसार यस पटक पनि शिक्षकबाट कुटपिट भएपछि घटनाबारे बुझ्दा विद्यालयका प्राचार्य टीकाराम न्यौपानेले आफूलाई थर्काएको अभिभावक चन्दाले बताइन् । विद्यालयमा शारीरिक यातना दिन नपाइने भए पनि पटक पटक कुटपिटका घटना दोहोरिएको उनको भनाइ छ ।

‘हामीले विद्यालयमा विश्वास गरेर आफ्ना नानीबाबुहरूलाई पढ्न पठाउने तर यहाँ शिक्षकले कुटपिट गर्दा विद्यार्थीलाई मनोवैज्ञानिक त्रास बढेको छ । मनोविज्ञानमा गम्भीर असर परेको छ । यसमा विद्यालय प्रशासन र विद्यालयका प्राचार्य गम्भीर बन्नुपर्छ’, उनले भनिन् । कक्षा ७ देखि सोही विद्यालयमा अध्ययन गर्दै आएका आफ्नो छोरा कुटीनु र घटना बारे बुझ्दा उल्टै थर्काउने काम हुनु ‘दादागिरी पउन’ भएको अभिभावकको आरोप छ ।

शिक्षकको कुटाइबाट घाइते भएका जेनितलाई अभिभावकले लुम्बिनी हस्पिटल एण्ड टेक्निकल कलेज प्रालिमा उपचार गराएका थिए । जेनितलाई १५ दिन आराम गर्न चिकित्सकले सुझाव दिएका छन् । चिकित्सकका अनुसार कानमा चड्कन हान्दा जेनितको बंगारामा असर पुगेको छ ।

विद्यालयका प्राचार्य टीकाराम न्यौपानेले भने आफूलाई पनि विद्यार्थीलाई कुटपिट भएको जानाकारी आएको र यसबारे थप बुझ्ने प्रयास भइरहेको बताए । घटना सार्वजनिक भएसँगै सम्बन्धित शिक्षकलाई सम्पर्क गरी छलफलका लागि भोलि बुधबारका लागि बोलाइएको उनले बताए । यसैगरी अभिभावकले जिज्ञासा राख्दा थर्काएको बारेमा उनले गलत बुझाई भएको बताए । घटना हुने समयमा आफू पनि विद्यालय बाहिर भएको हुँदा थप बुझ्न नपाएको बारे जानकारी गराउँदै गर्दा अभिभावकहरुले गलत बुझेको हुन सक्ने बताए । यसैगरी कुटिएका भन्ने विद्यार्थीको बारेमा पनि आफूले बुझेको बताउँदै उनले भने ‘विद्यार्थीको गालामा समान्य सोयलिङ भएको छ । त्यती ठूलो चोटपटक लाग्ने गरी केही भएको छैन । घटना बारे थप बुझ्ने काम हुन्छ ।’