प्रदेश ५ शिक्षा क्षेत्रमा मुलुककै उत्कृष्ट : मन्त्री चौधरी

मंसिर ८,
ग्लोबल आवाज
तिलोत्तमा । प्रदेश पाँच सरकारका प्रवक्ता एवम् भौतिक पूर्वाधार विकासमन्त्री वैजनाथ चौधरीले प्रदेश पाँचलाई शिक्षाको हवको रुपमा विकास गरिने बताएका छन् । प्रदेश सरकार गुणस्तरीय शिक्षाको लागि पूर्वाधार तयारीमा जुटेको बताउँदै मन्त्री चौधरीले शिक्षामा देशकै नमूना प्रदेशको रुपमा विकास गरिने बताए । रुपन्देहीको तिलोत्तमामा अवस्थित राममणि बहुमुखी क्याम्पस मणिग्रामको पहिलो क्याम्पस सभाको उद्घाटन गर्दै उनले गुणस्तरीय शिक्षाबिना भविष्यमा असल राजनैतिक संस्कारको विकास नहुने उल्लेख गरे ।

शिक्षा क्षेत्रमा प्रदेश ५ मुलुककै उत्कृष्ट भएको उनको दाबी छ । विकासको दृष्टिले पनि प्रदेश पाँच अन्य प्रदेशको तुलनामा उत्कृष्ट भएको उनले बताए । अहिले लगानीमैत्री वातावरण तयार गरिरहेको बताउँदै दुई उदियमान ठुला राष्ट्रको बीचमा रहेको मुलुकले अब विकासमा फड्को मार्नु अपरिहार्य रहेकोमा जोड दिए । तिलोत्तमा नगरपालिकाका प्रमुख वासुदेव घिमिरेले तिलोत्तमामा आगामी शैक्षिक सत्रदेखि स्थानीय पाठ्यक्रम कार्यान्वयन हुन लागेको जानकारी दिंदै शिक्षा क्षेत्रमा राममणि क्याम्पसले पुर्याएको योगदान उल्लेख्य रहेको बताए । उनले तिलोत्तमालाई शैक्षिक विकासको समेत केन्द्र बनाउने गरी स्थानीय सरकार अघि बढेको भन्दै यहाँका सामुदायिक विद्यालयलाई निकट भविष्यमै संस्थागत विद्यालयको दाँजोमा पुर्याइने बताए ।

कार्यक्रममा प्रतिवेदन प्रस्तुत गर्दै क्याम्पस सञ्चालक समितिका अध्यक्ष रोमणिप्रसाद पाठकले तिलोत्तमा नगर शहरोन्मुख नगरको रुपमा विकास भइरहेकाले आगामी दिनमा प्राविधिक र व्यावसायिक विषयको आवश्यकता बढ्दै गएको बताए । सभाले राममणि बहुमुखी क्याम्पसकोे सञ्चालक समितिको अध्यक्षमा पुनः रोमणि प्रसाद पाठकलाई निर्विरोध चयन गरेको छ ।