कालिकाका शिक्षकका लागि पुनर्ताजगी तालिम

बुटवल । कालिका मानवज्ञान माबी बुटवलमा ४ दिने शिक्षक पुनर्ताजगी तालिम सम्पन्न भएको छ । तालिममा वार्षिक कार्ययोजना निर्माण, शैक्षिक सामग्री निर्माण र संकलन तथा विद्यार्थी मुल्यांकन विधिको बारेमा विषयगत र सामुहिक प्रशिक्षण दिइएको थियो । नयाँ पाठ्यक्रमले शिक्षणमा ब्यवहारिक र सामुहिक क्रियाकलापलाई जोड दिएकोले परिवर्तन परिवेशअनुसार गुणस्तरीय शिक्षा प्रदान गर्नको लागि सिकाईमा आधारित तालिम संचालन गरिएको तालिम संयोजक ईबराज तिवारीले बताए ।

शिक्षण गर्दा देखापर्ने समस्याहरू समाधान गर्न, विद्यार्थीमैत्री शिक्षण पद्धति अपनाउन, कक्षाकोठालाई बालमैत्री बनाउनको लागि अनुभव र सिकाई आदानप्रदान गर्नको लागि हरेक वर्ष शैक्षिकसत्रको शुरुमा शिक्षक पुनर्ताजगी तालिम संचालन गर्दै आएको कालिका मानवज्ञान माबिका प्रधानाध्यापक दिनेश थापा बताउँछन्। यस्ता तालिमले परिवर्तित वातावरणमा उपयुक्त शिक्षण विधिको छनौट गर्न, शैक्षिक सामग्रीको निर्माण र संकलन गर्न मद्दत पुग्ने उनको भनाई छ ।

तालिममा शिक्षकहरुलाई विषयगत रुपमा विद्यालयका विषय प्रमुखहरुले पाठयोजना निर्मान, शैक्षिक सामग्री निर्माण र विद्यार्थी मुल्यांकनको बारेमा र शिक्षाविद् प्राध्यापक आनन्दमान शाक्य , अरुण क्षेत्री र घनश्याम पाठकले शिक्षण पद्धति , कक्षाकोठा ब्यवस्थापन र उत्प्रेरणाको बारेमा प्रशिक्षण दिएका थिए । तालिममा " सिङ्गो बुटवल एक विद्यालय " कार्यक्रम अन्तर्गत कालिका मानवज्ञान माबिको अभिभावकत्वमा रहेका विद्यालयका शिक्षकहरुको सहभागिता रहेको थियो ।