रुरु क्षेत्र रिडीमा १४ करोडको तीनमुखे पुल निर्माण सकिन लाग्यो

रिडी । पवित्र रुरुधामको चर्चा यतिबेला चुलिएको छ । धार्मिक क्षेत्रको रुपमा परिचित रहेर पनि विकासले लामो समय ओझेल परेको यो क्षेत्र पछिल्ला केही वर्षदेखि यहाँ बनिरहेको एसियाकै एकमात्र तिनमुखे पुलका कारण आकर्षणको केन्द्र बन्न पुगेको छ ।धार्मिक पर्यटनका लागि प्रसिद्ध गन्तव्य बन्न सक्ने गरि रुरुक्षेत्रको रुरुधाममा यतिबेला सँरचना हरु बनिरहँदा यहाँको तिनमुखे पुलले विशेष महत्व राख्दछ ।

रिडी संगम झोलुङ्गे पुल नाम दिइएको तीनमुखे पुलको निर्माण कार्य करिब उनान्सय प्रतिशत सकिएको छ र केही दिनभित्र सकिने पुलको काम पछिल्लो पटक हेरि रहेको जलप नेपाल प्राईभेट लिमिटेडका परियोजना प्रबन्धक केदार ढुंगेलले बताए । विक्रम सम्वत २०७१ असार १० गते सम्झौता भई काम शुरु भएको यो परियोजना काम शुरु भएको मितिले एक हजार पन्चानब्बे दिनमा सम्पन्न हुनु पर्ने थियो । तर, समय यसरी लम्वियो कि करिब सात वर्षमा यो पुल सम्पन्न हुने तयारीमा छ ।

शुरुमा नयाबाटो रुबिना मना जेबीले सम्झौता गरेको यो परियोजनालाई पछिल्लो पटक जलप नेपाल प्राईभेट लिमिटेड ले लिएपछि निर्माणमा गति लिएको हो । चौध करोड छत्तिसलाख बाह्र हजार पाँचसय तेईस रुपैयाँको ईस्टिमेटको यो पुल नौ करोड अठासीलाख छब्बीस हजार तिनसय बिस रुपैयाँमा टेन्डर भई काम शुरु भएको हो ।

अघिल्लो निर्माण कम्पनीबाट २०७५ सालको श्रावण महिनामा जलप नेपालले अख्तियार नामा लिई निर्माण कार्यको जिम्मा लिएपनि कोभिडको कारण र गतवर्ष कालिगण्डकीमा आएको बाढीले निर्माणका लागि लठ्ठामा क्षति पुर्याएपछि वाध्यतावस निर्धारित समयभन्दा दुईवर्ष पछि पुल सम्पन्न हुने अवस्थामा छ ।

हाम्रो लक्ष निर्धारित अवधिमा सक्ने थियो तर प्राकृतिक विपदा कोभिड समस्याका कारण निर्माण कार्य त पछाडि धकेल्यो नै करोडौँको घाटा व्यहोर्नु पर्याे प्रवन्धक ढुँगेलको भनाई छ । पुलको पाल्पा पट्टीको काम दशैँ ताक सकिएको हो तर स्याङ्जा तिरको भागमा अत्यधिक पहिरो जानुका साथै काम गर्न समेत गाह्रो भएपनि निरन्तर को प्रयासले त्यो क्षेत्र र गुल्मी क्षेत्रमा पनि काम सकिएको छ ।

यो पुलको सँरचनामा कालिगण्डकी नदि र रिडीखोलाको सँगममा पच्चीस मिटर अग्लो टावर निर्माण भएको छ जुन नौमिटर गोलाईमा साततला रहेको छ ।यहिटावरमा बिचबाट भर्याँग राखिएको छ र माथिल्लो तलाबाट यो क्षेत्रको अवलोकन गर्न सकिने गरि भ्युटावर हुनेछ । यहि टावरबाट स्याङ्जाको किपट गुल्मीको रिडी बजार र पाल्पाको ऋषिकेश क्षेत्रमा पुग्ने गरि तिन जिल्लालाई जोड्ने गरि हरेक तिर एक सय सतहत्तर दशमलव चार मिटरका झोलुँगे पुलहरु निर्माण भएका छन । चौवालीस एमएम डाएलको चार मेन केवल सँगै स्टिल डेक र वाक वे बिम पुलमा प्रयोग भएको निर्माण कम्पनी जलप नेपाल चितवनले जनाएको छ ।

मुख्य रुपले मोटरेवल ब्रिज , सस्पेन्सन ब्रिज ,बिजुलीका स्टिल पोल ,लगाएत निर्माण गर्ने ग्याल्भनाईजिँग प्लान्ट रहेको जलप नेपाल प्राईभेट लिमिटेड ले गुणस्तरीय सामाग्री प्रयोग गर्दै घाटै सहेर पनि पुल सम्पन्न गर्ने जस लिन सफल भएको छ । पुलको उनान्सय प्रतिशत काम सकिँदै गर्दा पुल हेर्न आउने आन्तरिक र वाह्य पर्यटक पनि तेत्तिनै रुरुक्षेत्रमा खनिन थालेका छन ।

दैनिक चार देखि पाँच बस आन्तरिक पर्यटक रुरुधाममा आउँछन केही यतै वस्छन जस्ले गर्दा होटल पनि दैनिक भरिएका छन होटल क्राउन रिडीका सञ्चालक नारायण ज्ञवालीले बताए । कालिगण्डकी स्नान पछि ऋषिकेश दर्शन र त्यसपछि पुलको अवलोकन सेल्फिसँगै फोटो खिच्नेकाममा पर्यटक हरुको आकर्षण बढेको रुरुक्षेत्र १ च्यूरेकका मेघराज ज्ञवालीले जनाए ।

रुरुक्षेत्र हुँदै मुक्तिनाथ सम्म पुग्ने कालिगण्डकी करिडोर ,यहिक्षेत्र बाट मदन भण्डारी राजमार्ग ,पोखरा शुर्खेत लगाएतका क्षेत्रका साथै ढोपाटन लगाएतका पर्तटकिय क्षेत्रमा जाने सडक सँरचाना बनिरहँदा र रिडीकै कायापलट हुने गरि रुरुधाम बृहत्तर परियोजनाको निर्माण कार्य पनि जारी रहँदा रुरुधाम धार्मिक पर्यटनको प्रमुख गन्तव्य बन्नेमा दुईमत छैन ।–कृष्ण अन्जान