लुम्बिनीसहित सबै प्रदेशमा सिटामोल वितरण

काठमाडौँ । काठमाडौँ उपत्यकालगायत देशका मुख्य सहरमा सिटामोललगायतका औषधि अभाव भएको गुनासो आइरहँदा सरकारले सिटामोलसहितका अन्य औषधिको अभाव नहुने विश्वास दिलाएको छ । सबै प्रदेशमा गरी एक करोड ३३ लाख ४२ हजार ट्याब्लेट सिटामोल वितरण गरिएको छ । स्वास्थ्य तथा जनसङ्ख्या मन्त्रालयका सहप्रवक्ता डा: समिरकुमार अधिकारीले सिटामोललगायत औषधिको अभाव नभएको जानकारी गराए ।

उनले केन्द्रीय मेडिकल स्टोर बाराबाट सातवटै प्रदेशलाई सिटामोल वितरण गरिएको बताए । प्रदेश १ को प्रदेश स्वास्थ्य आपूर्ति व्यवस्थापन केन्द्र विराटनगरलाई २७ लाख ६४ हजार ट्याब्लेट सिटामोल वितरण गरिएको उनले जानकारी दिए । यस्तै प्रदेश स्वास्थ्य आपूर्ति व्यवस्थापन केन्द्र धनुषालाई २१ लाख ३० हजार, प्रदेश स्वास्थ्य आपूर्ति व्यवस्थापन केन्द्र हेटौँडालाई १० लाख ९८ हजार ट्याब्लेट सिटामोल पठाइएको छ ।

गण्डकीको प्रदेश स्वास्थ्य आपूर्ति व्यवस्थापन केन्द्र पोखरालाई १८ लाख, लुम्बिनीको प्रदेश स्वास्थ्य आपूर्ति व्यवस्थापन केन्द्र बुटवललाई २७ लाख ३० हजार, प्रदेश स्वास्थ्य आपूर्ति व्यवस्थापन केन्द्र नेपालगञ्ज र कर्णाली प्रदेशलाई समेत गरी १० लाख २० हजार र सुदूरपश्चिम प्रदेश स्वास्थ्य आपूर्ति व्यवस्थापन केन्द्र धनगढीलाई १८ लाख ट्याब्लेट सिटामोल वितरण गरेको उनले बताए । सबै प्रदेशमा गरी एक करोड ३३ लाख ४२ हजार ट्याब्लेट वितरण गरिएको छ । सो मात्रामा सिटामोल वितरण गरेर पनि ११ लाख ५८ हजार सिटामोल मौज्दात रहेको अधिकारीको भनाइ छ । केन्द्रीय मेडिकल स्टोर बारा, पथलैयाले पारासिटामोल पाँच सय एमजीको वितरण गरेको जनाइएको छ ।

सिटामोल छ, सञ्चित नगरौँ
सिटामोलको औषधि अभावलाई ध्यानाकर्षण गर्दै नेपाल औषधि उत्पादक सङ्घ र सरकार मातहत रहेको नेपाल औषधि लिमिटेडले पनि सिटामोल उत्पादनलाई बढाएको छ । नेपाल औषधि लिमिटेडका महाप्रबन्धक मोहम्मद सफिउल्लाहले कोरोनाका कारण बजारमा सिटामोलको अभाव भएको बताए ।
कोरोना बढ्ने हल्लापछि सर्वसाधारणले धेरै सिटामोल सञ्चित गर्न थालेको आरोप लगाउँदै महाप्रबन्धक सफिउल्लाहले भने– “केही दिनदेखि सर्वसाधारणसमेत एक दुई पत्ता सिटामोलका लागि औषधि लिमिटेडमा आउने गरेका छन् ।’’ दुई दिनमा छ लाख सिटामोल उत्पादन भइरहेको जानकारी दिँदै उनले मौसम परिवर्तनले गर्दा मानिसमा रुघाखोकी, ज्वरो आउने भएकाले हवात्तै माग बढेको बताए ।

शुक्रबार मात्र शिक्षण अस्पताल वरिपरि भएका हरेक फार्मेसीमा दुई हजार पाँच सय ट्याब्लेटका दरले सिटामोल वितरण गरिएको जानकारी दिँदै उनले हरेक अस्पतालमा लिमिटेडले सिटामोल पुर्याउने बताए । सिटामोल सञ्चित गर्ने परिपाटीको अन्त्य हुनुपर्ने उनको भनाइ छ । औषधि लिमिटेडमा खरिदको झन्झटिलो प्रक्रिया र खरिदको सिलिङले पनि औषधि तथा सिटामोल उत्पादनलाई गाह्रो पारिरहेको उनले बताए ।

दुई करोडभन्दा बढी उत्पादन
नेपाल औषधि उत्पादक सङ्घका अध्यक्ष प्रज्वलजङ्ग पाण्डेले पछिल्लो समय सिटामोल उत्पादन बढाएको बताए । सिटामोल नेपाली औषधि उत्पादकले धानिरहेको भन्दै उनले कोरोनाका कारण माग ह्वात्तै बढेको बताए । महिनामा डेढ करोड सिटामोल उत्पादन गर्दै आइरहेकोमा माग बढेपछि दुई करोडभन्दा बढी सिटामोल उत्पादन गरिरहेको उनले बताए ।

नेपाली उत्पादकले सिटामोल नाफामूलक नभई सामाजिक उत्तरदायित्वको भावनाले उत्पादन गरिरहेको जानकारी अध्यक्ष पाण्डेले दिए । महिनाको डेढ करोड उत्पादन गरिरहेकोमा हाल माग बढेपछि उत्पादनलाई थप बढाइएको छ । कोरोनाले माग बढाएको भन्दै उनले २०६४ साल माघ १० गते समायोजन भएको औषधिको मूल्य अहिलेसम्म्म त्यही मूल्यमा बेचिरहनुपरेको गुनासो गरे ।

औषधि उत्पादन क्षेत्रमा नयाँ प्रविधि आएका छन्, कर्मचारीको तलब बढेको छ, ढुवानी खर्च बढेको भन्दै उचित समयमा नै गरिनुपर्ने समायोजन नगर्दा व्यवसायीलाई मर्का परेको उनले बताए । हाल नेपालमा १२ वटा कम्पनीले सिटामोल उत्पादन गरिरहेका छन् । उनले सिटामोल बनाउने कम्पनीलाई उत्पादन बढाउन आह्वान गरिसकेको बताए । -गोरखापत्र