कपिलवस्तुमा बाणगँगाका विद्यालय भौतिक रुपमै सञ्चालनमा आउने

बुटवल । कपिलवस्तुको बाणगंगा नगरपालिकाका नगरप्रमुख मंगल प्रसाद थारुले अब नगरका विद्यालय भौतिक रुपमै सुचारु हुने बताएका छन् । लामो समय बालबालिका विद्यालय जान नपाएकोमा अभिभावक र विद्यालयको दबाब विद्यालय खोल्नु रहेकाले स्वास्थ्य मापदण्ड अपनाएर विद्यालय खुलाउनुको विकल्प नभएको नगरप्रमुख थारुले बताए ।

वडा नम्बर ११ को स्काईलार्क बोर्डिङ स्कुलले राखेको तीनदिने मन्टेश्वरी शिक्षक तालिम तथा कार्यशालाको उद्घाटन गर्दै थारुले भौतिक रुपमै नगरका विद्यालय खुलाउने तयारी भइरहेको जानकारी गराए । डिसिसिएमसीको निर्देशन अनुसार नगरका शिक्षकले समुदायमा गई कोरोनाको अवस्था पहिचान गरिसकेको र विद्यालय खोल्दा ठिक हुने रिपोर्ट ल्याइसकेको हुँदा अब चाँडै विद्यालय खोलिने उनको भनाई छ ।

यद्यपि विद्यालय भने सिकाइ केन्द्रको रुपमा सीमित विद्यार्थी राखेर चल्ने छन् । उनले भने-‘एकैपटक धेरै विद्यार्थी नभएर समुह वर्गिकरण गरी बालबच्चालाई राखेर अबको पठनपाठन अगाडी बढाउनु पर्छ । विद्यालयमा मास्क सेनेटाइजर अनिवार्य हुनुपर्दछ र सामाजिक दुरी पनि कायम भएको हुनुपर्ने छ । सरोकारवालासंगको पटकपटकको छलफलपछि नगर यस्तो निर्णयमा पुगेको हो ।’

कार्यक्रममा वडा नम्बर ११ का अवडाध्यक्ष सोमनाथ अर्यालले विद्यालय खोल्न चौतर्फी दबाब आएको बताए । पूर्णरुपमा स्वास्थ्य मापदण्ड अपनाएर सिकाई केन्द्रको रुपमा विद्यालय संचालन गर्न सकिने उनको धारणा छ । उनले तीन दिने कार्यशालाबाट धेरै कुरा सिकेर विद्यार्थीमाझ नयाँ ढंगले प्रस्तुत हुन शिक्षकशिक्षकालाई आग्रह गरे ।