जनकल्याण मावि सैनामैनाकै सर्वोत्कृष्ट विद्यालय, नगद राशीसहित सम्मानित

बुटवल । रुपन्देहीको सैनामैना–६ भरतपुरमा अवस्थित जनकल्याण मावि नगरकै सर्वोत्कृष्ट विद्यालय भएको छ । शैक्षिक गुणस्तर सुधारको कार्यमा उल्लेख्य प्रगति गरेकोभन्दै नगरपालिकाले विद्यालयलाई सर्वोत्कृष्ट घोषणासहित सम्मान गरेको छ । सैनामैना नगरपालिकाद्वारा शैक्षिक गुणस्तर परीक्षण गर्दा विद्यालय शिक्षाको गुणस्तर सुधारको कार्यमा नगरमै सर्वोउत्कृष्ट काम गरेको नगर प्रमुख चित्रबहादुर कार्कीले बताए ।

विहिबार भएको ९ औं नगरसभाको अवसरमा विद्यालयलाई नगद २ लाख पुरस्कार राशीसहित सम्मान गरिएको हो । सोही अवसरमा कक्षा ८ को परीक्षामा जिपिए ४ हासिल गर्ने सोही विद्यालयका ३ जना विद्यार्थी र उत्कृष्ट शिक्षकको रुपमा कमला न्यौपानेलाई सम्मान तथा पुरस्कार प्रदान गरिएको छ । नगरकै सर्वोत्कृष्ट विद्यालयका रुपमा सम्मानित भएपछि प्रधानाध्यापक अर्जुन प्रसाद पोखरेलले विद्यालयको शैक्षिक गुणस्तरलाई कायम राख्दै थप उर्जाशिल बन्ने बताए ।

उनले जनकल्याणको सफलतामा विद्यालय सम्बद्ध सबैको साथ सहयोग र स्नेहका कारण भएकाले सबैमा आभार समेत व्यक्त गरे । सम्मानले व्यबहारिक र गुणस्तरीय शिक्षा प्रदान गर्न जनकल्याण माविलाई थप प्रोत्साहन भएको प्रधानाध्यापक पोखरेलले बताए । जनकल्याण माविमा हाल कक्षा ११ र १२ मा कानुन विषयमा अध्यापन गराइदै आएको छ । सैनामैना नगरपालिकाले सैनामैना पर्रोहा परमेश्वर मावि र रामापुर माविलाई उत्कृष्ट विद्यालयको रुपमा सम्मानित गर्दै नगद १/१ लाख पुरस्कार राशी प्रदान गरेको छ ।