भारतीय श्रमिकहरूलाई खोजीखोजी फिर्ता

परासी । पश्चिम नवलपरासीका विभिन्न सीमावर्ती नाकाबाट छिरेका खेत रोप्ने भारतीय श्रमिकलाई खोजीखोजी फिर्ता पठाइएको छ । सीमावर्ती नाकामा आउ-जाउमा रोक लगाइएपनि करिब २ हजार बढीको संख्यामा भारतीय श्रमिकहरू जिल्ला छिरेका थिए ।

ठूलो संख्यामा श्रमिकहरू छिरेसँगै नाकाको कडाइ फितलो देखिएपछि प्रमुख जिल्ला अधिकारी धर्मेन्द्र कुमार मिश्रसहित शसस्त्र र नेपाल प्रहरीका जिल्ला प्रमुखहरूको टोली आफैं पुगेर उनीहरूको खोजी गरेको थियो । जिल्लाका विभिन्न ठाउँमा समुह बनाएर हिँडिरहेका भारतीय श्रमिकहरूलाई नियन्त्रणमा लिएर उनीहरु जताबाट आएको हो त्यतै फुकाइएको प्रमुख जिल्ला अधिकारी मिश्रले बताए । उनीहरूलाई फिर्ता पठाउन प्रहरीले गाडी र टेस्टरको व्यवस्था गरेर महेशपुरको नाकासम्म पुर्‍याएको थियो । त्यहीबाट उनीहरु भारततर्फ गएका हुन् ।

अझ पनि श्रमिकहरूको निगरानी गरी खोजी भइरहेको मिश्रले बताए । प्रमुख नाका बन्द रहेकाले सुरक्षाकर्मीको आँखा छलेर उनीहरु खेत र अन्य बाटो प्रयोग गरेर जिल्ला छिरेको प्रमुख जिल्ला अधिकारी मिश्रको भनाई छ ।हरेक वर्ष खेत रोप्ने समयमा कामको खोजी गर्दै भारतको उत्तर प्रदेश र बिहारबाट श्रमिकहरू जिल्लामा आउने गरेका छन् । भारतमा भन्दा नेपालमा ज्याला बढी पाइने भएकाले रोपाइँको समयमा उनीहरु नेपाल आउने गर्दछन् ।