परीक्षाको अन्यौल र संक्रमणको त्रासमा एसइई र कक्षा १२ का विद्यार्थी

काठमाडौं । कोभिड-१९ संक्रमणको महामारीले स्थगित नभएको भए आजदेखि माध्यमिक शिक्षा परीक्षा (एसइई) सुरू हुन्थ्यो।

देशव्यापी रूपमा कोरोना महामारीको दोस्रो लहर फैलिएसँगै जारी भएको निषेधाज्ञा र भाइरसको प्रकोप बढ्दै गएपछि राष्ट्रिय परीक्षा बोर्डले वैशाख २७ गते अर्को सूचना जारी नभएसम्मका लागि परीक्षा स्थगित गरेसँगै परीक्षाको अन्यौल छाएको छ। 

परीक्षाको अन्यौल र महामारीको प्रकोपका कारण एसइई परीक्षाका लागि तयारी गरेका विद्यार्थीहरूमा मानसिक असर पर्न सक्ने त्रास पनि बढेको छ। 

एकातिर अब परीक्षा कहिले हुन्छ भनेर चिन्ता र अर्कोतर्फ कोरोना सङ्क्रमणबाट कसरी बच्ने भन्ने चिन्ताले परीक्षाको तयारीमा रहेका विद्यार्थी तनावबाट गुज्रनु परेको बताउँछिन् मध्यपुर थिमि नगरपालिका–४ राधेरोधेकी एलिशा श्रेष्ठ। 

एसइईको भन्दा कोरोना भाइरसको त्रास बढी रहेको उनको भनाइ छ। परीक्षाको तयारी गर्दै नियमित अनलाइन कक्षामा बस्दै अएकी उनलाई अब परीक्षा कहिले होला, कसरी होला भन्ने चिन्ता त छँदैछ, त्यसमाथि कोरोना संक्रमणबाट कसरी बच्ने भन्ने चिन्ता लागिरहेको बताउँछिन्।  

आफ्नै छिमेकीमा रहेकी अस्मिता थापालाई कोरोना संक्रमणले गाह्रो पारेपछि एलिसालाई समेत मनोवैज्ञानिक असर परेको छ। 

एउटै विद्यालयमा अध्ययनरत साथीलाई केहीदिन अगाडि कोरोना संक्रमणले उनको अनलाइन कक्षा त छुट्यो र निकै सास्ती भएको उनलाई थाहा छ। 

अस्मिता भन्छिन्, ‘कोरोना संक्रमण भइहाल्यो, पढाइ पनि छुट्यो, मलाई निकै कमजोर बनाएको छ, यही बीचमा परीक्षा भयो भने कसरी दिने भन्ने चिन्ता धेरै छ, हामीले खोप पनि पाएका छैनौं, खोई कसरी बाँच्ने र परीक्षा दिने जस्तो भयो।’ 

बाबुलाई संक्रमण पुष्टि भएको दुई दिनपछि ज्वरो आएको उनलाई पनि भाइरसले आक्रमण गर्यो। 

यतिखेर विद्यालयका प्रिन्सिपल, शिक्षक, शिक्षिकादेखि परीक्षाको तयारीमा रहेका धेरै विद्यार्थीहरूलाई कोरोना संक्रमण भएको प्याब्सनको भनाइ छ। 

भक्तपुरमा मात्रै ९२ प्याब्सनसँग आवद्ध भएका शिक्षक, कर्मचारीलाई सङ्क्रमण भएको बताउँछन् प्याब्सन भक्तपुरका अध्यक्ष चन्द्र अधिकारी। 

देशको यो विषम परिस्थितिमा कसरी परीक्षा हुन्छ भन्ने चिन्ता आम विद्यार्थीमा रहेको र अनलाइन परीक्षा लिँदा पनि अगाडि नै प्रश्नपत्र बाहिरिने खतरा रहेको उनी बताउँछन्। 

प्याब्सन अध्यक्ष एवं भक्तपुर निष्टका प्रिन्सिपल अधिकारीले परीक्षा कसरी हुन्छ भनेर अभिभवाक र विद्यार्थीले चिन्ता व्यक्त गरिरहेको बताउँछन्।  

शिक्षा विज्ञान तथा प्रविधिमन्त्री कृष्णगोपाल श्रेष्ठले अहिलेको अवस्थामा विद्यार्थीहरू भौतिक रूपमा उपस्थित भएर परीक्षा सञ्चालन गर्ने अवस्था नभएको बताउँछन्। विद्यार्थीको स्वास्थ्यभन्दा परीक्षा ठूला नभएको भन्दै उनले विद्यार्थीको स्वास्थ्यलाई ध्यानमा राख्दै यही महिनामा एसइई र कक्षा १२ को परीक्षाको बारेमा उपयुक्त विकल्पसहित निर्णय हुने उनले बताए।

यसवर्ष एसइई परीक्षाको तयारीमा रहेका धेरै विद्यार्थी आफैं कोरोना संक्रमित रहेको र यो क्रम अझै बढ्ने अवस्थामा अनलाइन परीक्षामा पनि धेरै विद्यार्थी सहभागी हुन नसक्ने अभिभावकहरूको धारणा छ। कतिपय विद्यार्थीले मोबाइलबाट अनलाइन कक्षा लिएका छन्। 

सबै विद्यार्थीसँग इन्टरनेट, कम्प्युटर र ल्यापटपको पहुँच छैन, मोबाइलबाट अनलाइन परीक्षा दिन सकिन्न। त्यसैले अनलाइन परीक्षाको प्रभाव नरहने अभिभावकको भनाइ छ।

अभिभावक संघ नेपालका केन्द्रीय अध्यक्ष केशव पुरीले परीक्षामुखी शिक्षालाई जोड दिनु गलत भन्दै विद्यार्थीको भौतिक उपस्थिति र अनलाइन परीक्षा यतिखेर दुबै उपयुक्त छैन भन्छन्। 

यसवर्ष कोरोना सङ्क्रमण जटिल रहेको र धेरै विद्यार्थी तथा अभिभावक सङ्क्रमित रहेकाले गतवर्ष जस्तै विद्यालयको आन्तरिक मूल्याङ्कन विधिमै यसवर्ष पनि जानुपर्ने उनको धारणा छ। 

विद्यालयले सञ्चालन गर्ने कक्षा नौ सम्मको परीक्षालाई सरकारले विश्वास गर्ने अनि कक्षा १० को पढाइ र मूल्यांकनलाई किन विश्वास नगर्ने भन्दै उनले स्वदेश मै उच्चशिक्षा अध्ययन गर्ने र कतिपय विदेश जाने भएकाले कक्षा १२ को परीक्षालाई भने फरक विधि अपनाउन सकिने बताउँछन्। 

‘यसवर्ष धेरै विद्यार्थी संक्रमित भएका छन्, यो क्रम बढ्दै छ, अनलाइन परीक्षाका लागि देशभरका सबै विद्यार्थीको पहुँच पुग्दैन भरपर्दो पनि छैन,’ संघका अध्यक्ष पुरी भन्छन्, ‘त्यसैले कक्षा १० मा आन्तरिक मूल्याङ्कन गर्ने र कक्षा १२ को हकमा भने अनलाइन परीक्षा प्रणाली उपयुक्त हुन्छ।’ 

अभिभावकका लागि सन्तानको स्वास्थ्यभन्दा ठूलो परीक्षा हुन नसक्ने भन्दै कडाइका साथ विधि बनाएर यस वर्ष पनि विद्यालयलाई जिम्मा दिनुपर्ने उनको भनाइ छ।

प्याब्सन केन्द्रीय उपाध्यक्ष दीपिका थापा रिमालले कोरोनाले अभिभावकदेखि परीक्षाको तयारीमा रहेका विद्यार्थीमा निकै त्रास बढेको बताउँछिन्। 

उनले विद्यार्थीहरूले परीक्षा अगाडि पढिरहेको र परीक्षा पछाडि शव बोकेको जस्ता तस्बिर र त्रसित भनाइहरू सामाजिक सञ्जालमा राख्ने गरिएको भन्दै अभिभावक र विद्यार्थीमा भाइरस सङ्क्रमण बढ्दा जटिल अवस्था आएको बताउँछिन्। 

गतवर्ष जस्तो पूर्ण रूपमा विद्यालयलाई जिम्मा दिन नहुने भन्दै उनले हचुवाको भरमा मूल्याङ्कन गर्ने गरी जान नहुने बताइन्। 

निश्चित विधि बनाएर जानुपर्ने प्याब्सनको धारणा रहेको उनले बताइन्।

प्याब्सनसँगको छलफलमा यस वर्षको परीक्षामा सरकारले चारवटा बिधिमा परीक्षा सञ्चालन गर्ने बारेमा छलफल गरेको बताउँदै सिद्धार्थ विद्यापीठकी प्रिन्सिपल एवं प्याब्सन उपाध्यक्ष थापा भन्छिन्, ‘एउटा गतवर्षको जस्तो आन्तरिक मूल्याङ्कन गर्ने, दोस्रो विद्यार्थीलाई प्रश्नपत्र दिएर अनलाइनबाट परीक्षा दिलाउने, तेश्रो आफैं परीक्षा गराउने र चौथो भारतमा जस्तै परीक्षा नै नगरी कक्षा १० मा आन्तरिक मूल्यांकन गर्ने र कक्षा ११ को भर्ना लिँदा प्रवेश परीक्षालाई कडाइ पार्दै ती विद्यार्थीले कक्षा १२ को परीक्षा दिँदा कडाइ गर्ने भन्ने बारेमा प्याब्सन र शिक्षा मन्त्रालयको टोलीसँग चार वटा ‘मोडालिटी’मा छलफल भएको छ।’

एसइईको हकको निर्णयमा ढिलाइ गर्न नहुने बताउदै आन्तरिक मूल्याङ्कन विधि गतवर्षको जस्तो नभई सुधारिनुपर्ने उनको  भनाइ छ। 

राष्ट्रिय परीक्षा बोर्डले वैशाख २७ गते एसइई र कक्षा १२ को परीक्षा कसरी सञ्चालन गर्न सकिन्छ भन्ने अध्ययन गर्न शिक्षा तथा मानव स्रोत विकास केन्द्रका महानिर्देशक बैकुण्ठ अर्यालको संयोजकत्वमा गठन गरेको कार्यदलले आज आफ्नो प्रतिवेदन बोर्डलाई बुझाउने भएको छ। 

कार्यदलका संयोजक अर्यालले कक्षा ८ को परीक्षा आन्तरिक मूल्याङ्कन गर्ने निर्णय गरे पनि कक्षा १० र १२ को बारेमा कार्यदलले तयार पारेको प्रतिवेदन बोर्डलाई बुझाउने तयारी गरेको बताए।    

उनले भने, ‘कार्यदलले विभिन्न सरोकार भएका निकायहरूसँग समेत छलफल गरेर विभिन्न मोडालिटीसहित प्रतिवेदन तयार पारेको छ, यो आज बोर्डलाई बुझाउँछौं, त्यो बोर्डको सम्पत्ति हो, कहिले, कसरी परीक्षा गर्ने भन्ने अन्तिम निर्णय बोर्डको हुन्छ।’

गत वर्ष एसइई परीक्षा सञ्चालनको अन्तिम समयमा सरकारले परीक्षा स्थगित गरेर पछि आन्तरिक मूल्याङ्कन गर्ने निर्णय गरेको थियो। 

यस वर्ष भने कसरी गर्ने भन्ने बारेमा बोर्डलाई जिम्मेवारी दिएको छ। 

कार्यदलले आज बुझाउने भनिएको प्रतिवेदन अन्तिम नभई ड्राफ्ट मात्रै भएको बताउँछन् परीक्षा बोर्डका अध्यक्ष चन्द्रमणि पौडेल। 

उनका अनुसार प्रतिवेदन बुझेपछि त्यसलाई अध्ययनका लागि बोर्ड सदस्यहरूलाई पठाउने र अहिलेको अवस्थामा परीक्षा सञ्चालन गर्न सम्भव हुने या नहुने, कसरी अगाडि बढ्ने भन्ने बारमो बोर्ड बैठकमा छलफल हुन्छ। 

‘गतवर्ष परीक्षा स्थगित भएपछि सरकारले नै निर्णय गरेको थियो, यसवर्ष बोर्डलाई दिएको छ, बोर्डले कार्यदलको मस्यौदाको अध्ययनपछि छलफल गरेर केही दिनमा अन्तिम निर्णय कार्यान्वयनमा लैजान्छ,’ अध्यक्ष पौडेलले भने, ‘त्यसअघि शिक्षा मन्त्रालयमा समन्वय गर्छौं, अन्तिम निर्णय हुनुअगाडि मन्त्रालय र मन्त्रिपरिषदसम्म पुग्यो भने पनि यो महिनासम्ममा सबै निर्णय हुन्छ।’

यसवर्ष करिब पाँच लाख १७ हजार विद्यार्थी एसइईको तयारीमा छन्। 

परीक्षाका लागि प्रश्नपत्र छपाइसँगै देशभरका दुई हजार १९ परीक्षा केन्द्र निर्धारण भएको थियो। त्यस्तै, जेठ २६ बाट हुने कक्षा १२ को परीक्षा स्थगित भएसँगै प्रश्नपत्र छपाइ भने रोकिएको छ। 

गत वर्ष कोरोना महामारीका कारण एसइईका परीक्षार्थीलाई विद्यालयले गरेको आन्तरिक मूल्यांकनका आधारमा बोर्डले नतिजा दिएको थियो भने कक्षा १२ मा अनलाइनबाटै प्रश्नपत्र पठाएर घरपायक परीक्षा केन्द्रमा परीक्षा सञ्चालन गरिएको थियो। 

यो वर्ष इन्टरनेट सुविधा पुगेका निश्चित परीक्षा केन्द्रमा मात्रै प्रश्नपत्र पठाएर परीक्षा लिने तयारी बोर्डले गरे पनि स्थगित भएपछि कसरी जाने भन्नेबारेमा निर्णय भएको छैन। रासस